2016-09-22 Dialektavond in het Gildegebouw Zeddam

Geplaatst op zaterdag 15 oktober 2016 om 18:29

Dat ’t ook aover dialecverlies ging, ko-j op den aovend van 22 september in 'n goed gevuld Gildegebouw in Zeddam niet echt marke. De dialecwarkgroep van de Heemkundekring had net as eerder op de heemkundedagen van de HKB weer ’n mooi en afwisselend programma rondum ons Barghse dialec samengesteld. Dat was ook niet zo arg moeiluk, want de warkgroep het alle capaciteite in huus um zoiets op de planke te brenge: verhalevertellers, muzikante, filmers en dialecdeskundigen.

De aovend wierd muzikaal gevuld deur ’t bekende duo Fris van de Draod. Toon Hebing en Lau Bisselink uut Zeddam komme altied weer verrassend uut de hoek met heel eigen en humoristische dialectekste en frisse melodieën. Kiek maor ’s op disse youtube-film en heur hoe köt de nötte bi-j Fris van de Draod könne zun: Youtube

Achtergronden aover wat now ’n dialec is en wat ’n taal, aover de plaats van ’t Barghs dialec binnnen ’t Nederfrankisch taalgebied en hoe de dialectologen dat allemaol bepale sprak Antoon Berentsen, din als germanist zich de letste jaore op ’t Liemers dialec gestort het.
Zie: Twitter en Facebook Hi-j gaf ’n aantal actuele veurbeelde veur ’t langzaam afsmelte van ’t dialec naor ’n regiolec, dat ’n mengeling is van standaardnederlands met ’n paar regionale kenmerke. Daor kö-j aardig van streek van zun! Vandaor de titel van zien laezing “Van streek en taal”. Maor Antoon pleitte d’r ook veur dat degenen, die nog plat könne, daor trots op zolle motte waeze. En dan de eige taal ook zolle motte spraeke, niet alleen thuus, maor ook op straot en bi-j de bakker en in de eige vereniging.

In de pauze ’n verrassing. De Tolkamerse bard Paul Mulder was in de zaal um zien Liemerse streektaalfestival “Uut de Klei” op 8 oktober in Babberich te promote. Hi-j grop de gitaar en zong in dialoog met de zaal ’n lied, waorut blek dat de minse in Zeddam allemaol hun plat nog könne!

Met Willem Straub is dit jaor helaos ’n opvallende platpraoter uut de dialecwarkgroep gestorve. Willem was bekend van zien commentare op de actualiteit via zien facebookpagina, maor ook via stads-TV. Um Willem te ere en te herdenke hier ’n link naor zien optrede: StadsTvBergh.

De man met de langst staat van dienst is ongetwiefeld Henk Harmsen, de samensteller van ons Barghse woordenboek ’n Trop Barghse Weurd (nog te kriege bij de HKB!) en journalist veur De Gelderlander, gespecialiseerd in streek en taal. Henk het in 2011 zien oldershuus en jeugd in Stökkum vereeuwigd in ’n lijvig boekwark “Boerenjeugd op de grens”. In Zeddam schudde hi-j ’n onmundig aantal anecdotes uut de mouw, die zo komisch ware, da-j haos niet kon geleuve dat zi-j echt gebeurd ware.